സി.പി.ഐയുടെ വാര്‍ഡായ നായാടിക്കുന്നില്‍ സി.പി.എം മത്സരിച്ചാല്‍ മറ്റു വാര്‍ഡുകളില്‍ സി.പി.എമ്മിനെതിരെ സ്ഥാനാര്‍ത്ഥികളെ നിര്‍ത്തുമെന്ന് സി.പി.ഐ.

മണ്ണാർക്കാട് നഗരസഭയിൽ സിപിഎം സിപിഐ ചേരിപ്പോര് വീണ്ടും ഉടലെടുക്കുന്നു. രണ്ടാം നഗരസഭയിലേക്കുള്ള തെരഞ്ഞെടുപ്പിൽ സ്ഥാനാർഥി നിർണയത്തിലാണ് ഇടതു മുന്നണിയിലെ ഇരു പാർട്ടികളും തമ്മിൽ തർക്കം ആരംഭിച്ചത്. ഇതിന് മുന്നോടിയായി നഗരസഭ ഇരുപത്തി രണ്ടാം വാർഡിൽ സിപിഎം, സിപിഐ സ്ഥാനാർത്ഥികൾ ഇടതുമുന്നണിയുടെ ബാനറിൽ പ്രചരണം ആരംഭിച്ചു. നിലവിൽ ഇരുപത്തിയൊന്നാം വാർഡ് കൗൺസിലർ കെ. മൻസൂർ ആണ് സിപിഎമ്മിനെ പ്രതിനിധീകരിച്ചു നായാടികുന്നിൽ ഇടതു സ്ഥാനാർത്ഥിയായി നിൽക്കുന്നത്. മൻസൂറിന്റെ ഫ്ലക്സുകൾ വാർഡിലെ വിവിധ കേന്ദ്രങ്ങളിൽ ഉയർന്നു കഴിഞ്ഞു. നാസർ കൊണ്ടുപറമ്പിലാണ് സിപിഐ യെ പ്രതിനിധീകരിച്ച് ഇടതു മുന്നണി സ്ഥാനാർത്ഥിയായി പ്രചരണം ആരംഭിച്ചത്. ഇതിനുള്ള പ്രവർത്തനങ്ങളും അണിയറയിൽ പൂർത്തിയാകുന്നു. ഇടതുമുന്നണിയുടെ തെരഞ്ഞെടുപ്പ് ധാരണ പ്രകാരമാണ് താൻ സ്ഥാനാർത്ഥിയാകുന്നതെന്ന് നാസർ പറഞ്ഞു. 35 വർഷത്തോളമായി സിപിഐ മത്സരിക്കുന്ന നായാടിക്കുന്ന് വാർഡ് വിട്ടു കൊടുക്കാൻ തവണ സിപിഎം തയാറാവാത്തതോടെ കഴിഞ്ഞ ദിവസം നടന്ന സീറ്റ്‌ വിഭജന ചർച്ച അലസി പിരിഞ്ഞിരുന്നു. നഗരസഭയിലെ 29 വാർഡിൽ 4 കൊടുവാളിക്കുണ്ട്, 27 ഒന്നാം മൈൽ, 29 നമ്പിയംകുന്ന്, 22 നായാടിക്കുന്ന് എന്നിങ്ങനെ 4 സീറ്റുകളാണ് ഉഭയകക്ഷി ചർച്ച പ്രകാരം സിപിഐക്കുള്ളത്. എന്നാൽ നായാടിക്കുന്ന് സിപിഐക്ക് വിട്ടു നൽകില്ലെന്ന് സിപിഎം നിലപാടെടുത്തതോടെയാണ് വാർഡിൽ സിപിഐ സ്ഥാനാർഥിയെ നിശ്ചയിച്ചത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ നിലവിലെ സ്ഥിതി നിലനിർത്തണമെന്ന മുന്നണി നേതൃത്വത്തിന്റെ നിർദേശം പ്രകാരമാണ് നായാടികുന്നിൽ സ്ഥാനാർത്ഥിയെ നിർത്തിയിട്ടുള്ളതെന്ന് സിപിഐ മണ്ണാർക്കാട് ലോക്കൽ കമ്മിറ്റി സെക്രട്ടറി പരമശിവം പറഞ്ഞു. മണ്ണാർക്കാട് മുനിസിപ്പാലിറ്റിയിൽ മുന്നണി ധാരണ പ്രകാരം 4 വാർഡുകളിൽ സിപിഐക്കാണ് അർഹത. ഇത് സംബന്ധിച്ച് ധാരണ ആയില്ലെങ്കിൽ നിലവിൽ സിപിഎം സ്വാധീനമുള്ള വാർഡുകളിൽ സ്ഥാനാർത്ഥികളെ നിർത്തും. ഇടതുമുന്നണി ഒരുമിക്കേണ്ട സമയത്ത് മണ്ണാർക്കാട് നഗര സഭയിൽ മാത്രം സിപിഎം നിലപാട് വിരുദ്ധമാകുന്നത് എങ്ങനെയെന്ന് അറിയില്ല. അർഹതപെട്ട വാർഡുകളിൽ സിപിഐ സ്ഥാനാർത്ഥികൾ തന്നെയാകും ഇടതു മുന്നണിയെ പ്രതിനിധീകരിക്കുകയെന്നും പരമശിവം പറയുന്നു.

News

കുമരംപുത്തൂർ പഞ്ചായത്തിലെ പാലിയേറ്റീവ് രോഗികൾക്കുള്ള മരുന്ന് വിതരണം പ്രതിസന്ധിയിൽ.

കുമരംപുത്തൂർ പഞ്ചായത്തിലെ പാലിയേറ്റീവ് രോഗികൾക്കുള്ള മരുന്ന് വിതരണം പ്രതിസന്ധിയിൽ. പഞ്ചായത്തിൽ മാത്രം 460 പാലിയേറ്റീവ് രോഗികളാണുള്ളത്. ഇവരിൽ മുന്നൂറിലേറെ പേരും നിത്യവും മരുന്ന് കഴിക്കുന്നവരാണ്. ഇവർക്കുള്ള മരുന്ന് കുടുംബാരോഗ്യ കേന്ദ്രം വഴിയാണ് നൽകുന്നത്. ബ്ലോക്ക് പഞ്ചായത്തിൽ നിന്നാണ് ഇതിനുള്ള പണം നൽകുന്നത്. 2,20,000 രൂപയുടെ മരുന്ന് ഇതിനകം വിതരണം ചെയ്തു. ‌കാരുണ്യയിൽ നിന്നാണു മരുന്ന് എടുക്കുന്നത്. ഈ തുക നൽകിയാലെ അടുത്ത മാസത്തേക്കുള്ള മരുന്ന് നൽകുകയുള്ളൂ. ഫണ്ട് വന്നിട്ടില്ലെന്നാണ് ബ്ലോക്ക് പഞ്ചായത്ത് അധികൃതർ പറയുന്നത്. രോഗികളിൽ ഭൂരിഭാഗവും നിർധനരാണ്. പലർക്കും പണം നൽകി മരുന്നു വാങ്ങാനുള്ള ശേഷിയില്ല. ഇവരുടെ മരുന്ന് മുടങ്ങുന്ന സാഹചര്യമാണു നിലവിലുള്ളത്. ഇത് ഒഴിവാക്കാൻ അടിയന്തിരമായി പണം അനുവദിക്കണമെന്നാണ് പാലിയേറ്റീവ് രോഗികളുടെയും ബന്ധുക്കളുടെയും ആവശ്യം.

വോട്ടർ പട്ടിക : മണ്ണാര്‍ക്കാട്‌ നഗരസഭയിൽ വിളിച്ച യോഗത്തിൽ ഉദ്യോഗസ്ഥർക്ക്‌ രാഷ്ട്രീയ പാർട്ടി പ്രതിനിധികളുടെ രൂക്ഷ വിമർശനം.

തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിനുള്ള വോട്ടർ പട്ടികയിൽ പേര് ചേർക്കുന്നതും നീക്കം ചെയ്യുന്നത് ചർച്ച ചെയ്യാൻ മണ്ണാര്‍ക്കാട്‌ നഗരസഭയിൽ വിളിച്ച യോഗത്തിൽ ഉദ്യോഗസ്ഥർക്ക്‌ രാഷ്ട്രീയ പാർട്ടി പ്രതിനിധികളുടെ രൂക്ഷ വിമർശനം. പേര് ചേർക്കാനും ഒഴിവാക്കാനും ഉദ്യോഗസ്ഥർ ചിലരുടെ ചട്ടുകമായി പ്രവർത്തിക്കുന്നുവെന്ന് ആരോപണം. വിജയ സാധ്യത കണക്കാക്കി വോട്ടർമാരെ കൂട്ടത്തോടെ മാറ്റുന്നതായാണ് ആരോപണം. അപേക്ഷകളിൽ കൃത്യമായ പരിശോധന നടത്തുന്നില്ലെന്നും പരാതി ഉയർന്നു. ഇപ്പോൾ പേര് ചേർക്കുന്നതിനും നീക്കം ചെയ്യുന്നതിനും നൽകുന്ന അപേക്ഷകളിൽ കൃത്യമായി പരിശോധന നടത്താൻ സമയം ഉണ്ടോ എന്ന രാഷ്ട്രീയ പാർട്ടി പ്രതിനിധികളുടെ ചോദ്യത്തിനു വ്യക്തമായ മറുപടി നൽകിയില്ല. ഇത്തരം യോഗങ്ങൾ മുൻ കൂട്ടി അറിയിക്കണമെന്നും പ്രതിനിധികൾ ആവശ്യപ്പെട്ടു. വിവിധ രാഷ്ട്രീയ പാർട്ടി പ്രതിനിധികളായ കെ.മനോജ്, അരുൺകുമാർ പാലക്കുർശ്ശി, ബിജു നല്ലമ്പാനി, കെ.വി.അമീർ, പരമശിവൻ, വേണുഗോപാൽ, മണികണ്ഠൻ, കെ.സി.അബ്ദുറഹ്മാൻ, ഷഫീഖ് റഹ്മാൻ, ഉദ്യോഗസ്ഥരായ ജെ.എ.നജൂം, ജയൻ എന്നിവർ പങ്കെടുത്തു.

യൂത്ത് കോണ്‍ഗ്രസ്സ് മുഖ്യമന്ത്രി പിണറായി വിജയന്‍, ബിനീഷ് കൊടിയേരി എന്നിവരുടെ കോലം കത്തിച്ച് പ്രതിഷേധിച്ചു.

യൂത്ത് കോണ്‍ഗ്രസ്സ് മണ്ണാര്‍ക്കാട് നിയോജകമണ്ഡലം കമ്മിറ്റിയുടെ നേതൃത്വത്തില്‍ മുഖ്യമന്ത്രി പിണറായി വിജയന്‍,ബിനീഷ് കൊടിയേരി എന്നിവരുടെ കോലം കത്തിച്ച് പ്രതിഷേധിച്ചു.സ്വര്‍ണ്ണ കള്ളക്കടത്തിനും,മയക്കുമരുന്ന് കടത്തിനും കൂട്ട് നില്‍ക്കുന്ന ഇടതുപക്ഷ സര്‍ക്കാറിന് കേരള ഭരണത്തില്‍ തുടരാന്‍ ധാര്‍മ്മിക അവകാശമില്ലെന്ന് യൂത്ത് കോണ്‍ഗ്രസ്സ് ആരോപിച്ചു.നിയോജകമണ്ഡലം യൂത്ത് കോണ്‍ഗ്രസ്സ് പ്രസിഡണ്ട് ഗിരീഷ് ഗുപ്ത ഉദ്ഘാടനം ചെയ്യ്തു.നേതാക്കളായ ഹാരിസ് തത്തേങ്ങലം,അമീന്‍ നെല്ലിക്കുന്നന്‍,ആഷിക്ക് വറോടന്‍,ജിയന്റോ ജോണ്‍,ഷഹറത്തലി തുടങ്ങിയവര്‍ പങ്കെടുത്തു.

4 വര്‍ഷം, 2 കോടിയിലധികം രൂപയുടെ വികസനങ്ങള്‍ : വാര്‍ഡില്‍ സമ്പൂര്‍ണ്ണ റോഡ് വികസനം സാധ്യമാക്കി കോട്ടോപ്പാടം പഞ്ചായത്ത് 7 ാം വാര്‍ഡ് മെമ്പര്‍ ഗഫൂര്‍ കോല്‍ക്കളത്തില്‍.

യുവത്വത്തിന്റെ ഊർജ്ജസ്വലത ജനക്ഷേമത്തിനായി സമർപ്പിച്ച കോട്ടോപ്പാടം ഗ്രാമ പഞ്ചായത്ത്‌ ഏഴാം വാർഡ് മെമ്പർ ഗഫൂർ കോൽകളത്തിൽ നാടിന് പ്രിയങ്കരനായത് ചരിത്രങ്ങളെ വഴിമാറ്റിയുള്ള വികസന, ക്ഷേമ പദ്ധതികളുടെ പരമ്പരകൾ സൃഷ്ടിച്ചാണ്. പതിനാലാം വയസ്സിൽ തുടക്കമിട്ട വിദ്യാർത്ഥി രാഷ്ട്രീയമാണ് ഗഫൂർ കോൽകളത്തിൽ എന്ന വ്യക്തിയുടെ പൊതുജീവിതത്തിന് ഊടും പാവും നൽകുന്നത്. 1994 ൽ മുസ്ലിം ലീഗിന്റെ വിദ്യാർത്ഥി പ്രസ്ഥാനമായ എം.എസ്.എഫിന്റെ ശാഖ സെക്രട്ടറിയായി കുറിച്ച രാഷ്ട്രീയ അരങ്ങേറ്റം പഞ്ചായത്ത്‌, നിയോജക മണ്ഡലം, ജില്ലാ തലത്തിലും സംസ്ഥാന സെക്രട്ടറിവരെയും ഉയർതലങ്ങളിലേക്കുള്ള നേതൃ പ്രയാണം ഗഫൂറിന്റെ സ്വതസിദ്ധമായ പ്രവർത്തന ശൈലിക്കും എളിമയും വിനയവുമുള്ള ഒരു സാധാരണ പൊതു പ്രവർത്തകൻ്റെ മികച്ച സംഘാടക മികവ്, ദീർഘ ദൃഷ്ടിയുള്ള നേതൃഗുണം, പക്വതയാർന്ന നേതൃപാടവം. ഭാവനാ സമ്പന്നത എന്നിവക്കുള്ള അംഗീകാരമായിരുന്നു. ഇപ്പോൾ യൂത്ത് ലീഗ് ജില്ല പ്രസിഡണ്ടായി തുടരുന്ന ഇദ്ദേഹം 2017 ജനുവരിയിൽ കോട്ടോപ്പാടം ഗ്രാമപഞ്ചായത്ത് ഏഴാം വാർഡ് അമ്പാഴക്കോടിൽ നടന്ന ഉപതെരഞ്ഞെടുപ്പിലൂടെയാണ് ജനകീയ അംഗീകാരം നേടിയത്. തൊണ്ണൂറുകളിൽ ലീഗിന്റെ മുഖ പത്രമായ ചന്ദ്രികയുടെ ലേഖകനായിരുന്നു. ജന പ്രതിനിധിയായി 4 വർഷം പൂർത്തിയാക്കുന്ന ഇദ്ദേഹം വാർഡിൽ രണ്ടു കോടിയിലധികം രൂപയുടെ സർവ്വ തല വികസനമാണ് നടത്തിയത്. തൻ്റെ കർമ്മ മേഖലകളിളെല്ലാം പുതിയ ആശയങ്ങളും ആകർഷക ശൈലിയും സ്വീകരിച്ച് കാലത്തിനൊപ്പം സഞ്ചരിച്ച ഗഫൂർ ഏഴാം വാർഡ് എന്ന പേരിൽ മൊബൈൽ അപ്ലിക്കേഷൻ ഉൾപ്പെടെ നവസാങ്കേതിക സൗകര്യങ്ങൾ ഉപയോഗപ്പെടുത്തിയാണ് ജനസമ്പർക്കത്തിനും പ്രശ്ന പരിഹാരത്തിനും വേദി തീർത്തത്. മെമ്പറേതേടി നടക്കാൻ വാർഡിലെ ജനങ്ങൾക്ക് അവസരം നൽകാതെ തൻ്റെ സേവനം ആവശ്യമായവരെ അങ്ങോട്ടു ചെന്നു കാര്യങ്ങൾ ചെയ്തു നൽകുന്ന പുതിയ രീതി കൈകൊണ്ട ഗഫൂർ അപേക്ഷകൾ, പേപ്പറുകൾ, സ്റ്റാമ്പ്‌ തുടങ്ങിയ സേവനങ്ങളും ഓൺലൈൻ ചാർജുകളും ഉൾപ്പെടെ എല്ലാം സ്വന്തം ചിലവിൽ നിർവഹിച്ചു. റോഡ് വികസനത്തിൽ വാർഡിൽ സമ്പൂർണ്ണ നേട്ടം കൈവരിച്ച ഗഫൂർ ഇക്കാലയളവിൽ ചെറുതും വലുതുമായി ഒട്ടേറെ റോഡുകൾ നവീകരിച്ചു. കുണ്ട്ലക്കാട് പാലാട്ടു പള്ള്യാൽ ചേപ്പുള്ളിപുറം റോഡ് ആണ് ഗഫൂറിന്റെ വികസന ചരിതങ്ങളിൽ സുവർണ്ണ ലിപികളായി തിളങ്ങുന്നത്. കേവലം പാടവരമ്പായിരുന്ന നടപ്പാതയെ നഗര പരിവേഷങ്ങളെ പോലും അമ്പരിപ്പിക്കുന്ന തരത്തിലാണ് ദേശീയ പാതക്ക് സമാനമായ വിധത്തിൽ ഗതാഗത യോഗ്യമാക്കിയത്. ഒരു കിലോ മീറ്ററോളം ദൈർഘ്യമുള്ള റോഡിന്റെ നവീകരണത്തിന് പഞ്ചായത്തിന്റെ വിവിധ പദ്ധതികളായി 12 ലക്ഷം രൂപ ചിലവിട്ടെങ്കിലും ജനങ്ങളുടെ സ്വപ്നസാഫല്യത്തിനായി എംഎൽഎ എൻ. ഷംസുദ്ധീനിൽ തുടർച്ചയായ സമ്മർദ്ദം ചെലുത്തി. തുടർന്ന് എംഎൽഎ ഇടപെട്ടതോടെ സംസ്ഥാന സർക്കാരിന്റെ 40 ലക്ഷം രൂപയാണ് റോഡിന്റെ നിർമ്മാണം ദീർഘ ലക്ഷ്യത്തോട് കൂടി പൂർത്തീകരിക്കാനായി വിനിയോഗിച്ചത്. ഇത് ജനങ്ങളും ഏറെ നെഞ്ചിലേറ്റി. 400 മീറ്റർ നീളമുള്ള അരിയൂർ നൂറുണ്ടൻ കുളമ്പ് പട്ടാണിക്കാട് റോഡ് ഓവ് പാലം ഉൾപ്പെടെ നിർമിച്ച് 12 ലക്ഷം ചെലവിൽ നവീകരിച്ചതും, 8 ലക്ഷം ചെലവിട്ട് വേങ്ങ പഴയ ബേങ്ക് അരിയൂർ റോഡ് വീതി കൂട്ടി വിപുലപ്പെടുത്തിയതും റോഡ് വികസനത്തിലെ ശ്രദ്ദേയ നേട്ടങ്ങളാകുന്നു. വേങ്ങ പട്ടിക ജാതി കോളനിയിലെ കുടുംബങ്ങൾക്ക് ശുദ്ധ ജലം എത്തിച്ചതാണ് ഗഫൂറിന്റെ സേവന ചരിത്രത്തിൽ അടുത്ത പൊൻതൂവൽ ആയി മാറിയത്. സമീപത്തെ പഞ്ചായത്ത് കുളത്തിൻ്റെ ഉടമസ്ഥവകാശ പ്രശ്നം പരിഹരിച്ച് നടപ്പാക്കിയ എസ്. സി കുടിവെള്ള പദ്ധതിക്കായി 10 ലക്ഷത്തോളം രൂപയാണ് ചെലവിട്ടത്. തുടർന്ന് നൂറോളം കുടുംബങ്ങൾക്കുള്ള വേങ്ങ ജനറൽ കുടിവെള്ള പദ്ധതിയുടെ നിർമ്മാണ പ്രവർത്തനങ്ങൾക്കും തുടക്കം കുറിച്ചു. രാജ്യ സഭാംഗം പി. വി. അബ്ദുൾ വഹാബിന്റെ ഫണ്ടിൽ നിന്ന് 5 ലക്ഷം രൂപ ഇതിലേക്ക് നീക്കി വപ്പിച്ചത് ഗഫൂർ കോൽകളത്തിലിന്റെ മാത്രം ശ്രമഫലമാണ്. ഇതിന് പുറമെ വാർഡിലെ എല്ലാ പൊതു കിണറുകളും ആഴം കൂട്ടി നവീകരിച്ചും ജലക്ഷാമം നേരിട്ടപ്പോൾ വാഹനത്തിൽ വെള്ളമെത്തിച്ചും കുടിവെള്ള കാര്യത്തിലും കാര്യക്ഷമത കാണിച്ചു. നാമ മാത്രമായുണ്ടായിരുന്ന കുടുംബശ്രീ യൂണിറ്റുകൾ ഇന്ന് 29 യൂണിറ്റുകളായി സജീവ പ്രവർത്തനങ്ങളിലൂടെ സ്ത്രീ സമൂഹം ശാക്തീകരിക്കപ്പെട്ടു. ഇതിനായി കുടുംബ സംഗമങ്ങളും, ശില്പ ശാലകളും സജീവമാക്കി. അങ്കണവാടികളുടെ വികസനവും ഏറെ പ്രാധാന്യത്തോടെ തന്നെ ഗഫൂർ നോക്കി കണ്ടു. ഇന്റർലോക്ക് പതിച്ചതുൾപ്പെടെ മാതൃകപരമായ പുരോഗതികളാണ് വേങ്ങ അങ്കണവാടിയിൽ വരുത്തിയത്. ഗ്രിൽ നിർമ്മാണം, ചുറ്റു മതിൽ, മനോഹരമായ പൂന്തോട്ടം എന്നിവയുൾപ്പെടെ നവീകരിച്ചു. ചോർന്നൊലിച്ച് നാമാവശേഷമാകാനിരുന്ന അമ്പാഴക്കോട് അങ്കണവാടിക്ക് ബ്ലോക്ക്‌ പഞ്ചായത്തിന്റെ 10 ലക്ഷം രൂപ വിനിയോഗിച്ച് പുതിയ കെട്ടിടം നിർമ്മിച്ചു. സ്വന്തമായി കുടിവെള്ള സൗകര്യവും ഒരുക്കി. അങ്കണവാടി കുട്ടികൾ ഉൾപ്പെടെ നഴ്സറി വിദ്യാർത്ഥികളുടെ കലാ സാഹിത്യ അഭിരുചി വിപുലപ്പെടുത്താൻ സ്വന്തം ചെലവിൽ രണ്ടു വർഷം നടത്തിയ വാർഡ് തല ബേബി ഫെസ്റ്റ് ഗ്രാമത്തിന്റെ ഉത്സവം തന്നെയാക്കി മാറ്റിയത് ഏഴാം വാർഡിൽ മാത്രം സവിശേഷതയായിരുന്നു. ജനങ്ങളുടെ ആരോഗ്യസുരക്ഷയിലും ഗഫൂറിന്റെ വ്യത്യസ്തതയുടെ കരസ്പർശം ഏറെ ഫലവത്തായ രീതിയിലാണ് പ്രതിഫലിച്ചത്. സർക്കാരിന്റെ വാർഡ്‌തല ശുചിത്വ സമിതി പ്രവർത്തനങ്ങളെ ഗ്രാമ സൗഖ്യം എന്ന പേരിൽ ആരോഗ്യ സുരക്ഷാ പദ്ധതിയാക്കി തന്റെ വാർഡിൽ അദ്ദേഹം വിപുലീകരിച്ചു. ഇതിനായി 100 കുടുംബങ്ങളെ അഞ്ചു മേഖലകളായി തിരിച്ച് നാട്ടൊരുമ എന്ന മാതൃക ആശയം നാടിന് പ്രജോദനമായിക്കൊണ്ടാണ് അദ്ദേഹം അവതരിപ്പിച്ചത്. ആതുര മേഖലയിലെ സർവ്വ വിഭാഗങ്ങളും കോർത്തിണക്കി വാർഡിലെ ജനങ്ങൾക്ക് മെഡിക്കൽ ക്യാമ്പുകൾ, പ്രതിരോധ മരുന്ന് വിതരണം, ഗൃഹ സന്ദർശന ബോധവൽക്കരണം എന്നിവയിലൂടെ ഫലവത്തായ രീതിയിൽ പ്രവർത്തിച്ചു. ലോക്ക് ഡൗൺ കാലത്തെ പ്രതിസന്ധിയിൽ ഭക്ഷണകിറ്റുകളും, മരുന്നുകളും ലഭ്യമായതോടെ ഈ പ്രവർത്തനങ്ങൾ ജനങ്ങൾക്ക് ഏറെ ആശ്വാസമായിരുന്നു. നാടിന്റെ നട്ടെല്ലായ യുവത്വത്തിനും ഊർജ്ജസ്വലമായ പ്രചോദനമാണ് ഗഫൂർ നൽകുന്നത്. അരിയൂരിൽ യുവാക്കളുടെ കായിക ക്ഷമത ലക്ഷ്യമിട്ട് മൃഗാശുപത്രിക്ക് പുറകു വശത്തെ സ്ഥലം പഞ്ചായത്ത് കളിസ്ഥലമാക്കി മാറ്റുന്നതിന് നിർണ്ണായക പങ്കാണ് അദ്ദേഹം വഹിച്ചത്. സാങ്കേതിക തടസ്സങ്ങളിൽ വർഷങ്ങളായി പൊലിഞ്ഞിരുന്ന യുവാക്കളുടെ സ്വപ്നമാണ് ഇതിലൂടെ പൂവണിയിച്ചത്. തുടർന്ന് ഗ്രാമ ബ്ലോക്ക് പഞ്ചായത്ത്‌ ഫണ്ടിൽ നിന്ന് മൂന്നര ലക്ഷം രൂപയുടെ ഗ്രൗണ്ട് നവീകരണ പദ്ധതിയുണ്ടാക്കി. ഉപയോഗശൂന്യമായ പഞ്ചായത്ത് വക കെട്ടിടം നവീകരിച്ചും ഫർണീച്ചറുകൾ സജ്ജീകരിച്ചും ഒരു സാംസ്‌കാരിക കേന്ദ്രമാക്കി നാടിനു സമർപ്പിച്ചതിലും ഗഫൂറിൻ്റെ ഇടപെടലുണ്ടായി. വീട്ടിൽ ഒരു മരം എന്ന പദ്ധതിയിലൂടെ വാർഡിൽ കുടുംബശ്രീ മുഖേന നടത്തിയ പരിസ്ഥിതി സംരക്ഷണ പദ്ധതിയും വ്യതിരെക്തമാണ്. വിതരണം ചെയ്ത വൃക്ഷ തൈകളുടെ പരിപാലനത്തിന് കുടുബങ്ങൾക്ക് പ്രചോദനം നൽകി ഹരിത പുരസ്കാരവും പ്രഖ്യാപിച്ചു. വേങ്ങ സെൻ്ററിൽ എം.എല്‍.എ ഫണ്ടിലും , കുണ്ട്ലക്കാട് സെന്ററിൽ പഞ്ചായത്ത് ഫണ്ടിലും മിനി മാസ്ററ് ലൈറ്റുകളും, അൻപതോളം പുതിയ തെരുവ് വിളക്കുകളും സ്ഥാപിച്ചു. നൂറിലേറെ പേർക്ക് പുതിയ പെൻഷൻ ലഭ്യമാക്കി വാർഡിനെ സമ്പൂർണ്ണ പെൻഷൻ ഗ്രാമമാക്കി മാറ്റി. എസ്എസ്എൽസി, പ്ലസ് ടു വിദ്യാർത്ഥികൾക്ക് മോട്ടിവേഷൻ ക്ലാസുകൾ, ഉന്നത വിജയികൾക്ക് പുരസ്‌കാരങ്ങൾ, ഓൺലൈൻ പഠന സൗകര്യങ്ങൾ തുടങ്ങി വിദ്യാഭ്യാസ മേഖലയിലും അതീവ ശ്രദ്ധ പുലർത്തി. പഞ്ചായത്തിൻ്റെ പൊതുവികസന പദ്ധതികൾക്ക് പുറമെ വാർഡിനു സ്വന്തമായി ജനകീയ - ക്ഷേമപദ്ധതികൾ ആവിഷ്കരിച്ചു നടപ്പാക്കുക വഴി വയോജനങ്ങളും, വീട്ടമ്മമാരും യുവാക്കളും ഉൾപ്പെടെ നാട്ടുകാരെല്ലാം തന്നെ തങ്ങളുടെ വാർഡ് മെമ്പറെ സംതൃപ്തിയോടെ അംഗീകരിക്കുന്നു. ഗഫൂർ കോൽകളത്തിൽ എന്ന യുവരാഷ്ട്രീയ നേതാവിനെ ജനകീയ നേതൃത്വത്തിലേക്ക് കൈപിടിച്ചുയർത്തിയ നേതൃത്വ നിരക്കും ഇദ്ദേഹത്തിന്റെ പ്രവർത്തനങ്ങളിൽ അതീവ സംതൃപ്തിയാണ് ഉള്ളത്. സംഘടന നേതൃത്വത്തിൽ നിന്ന് ജനകീയ പദ്ധതികളിൽ ദീർഘ വീക്ഷണം നടത്തി സാരഥ്യം വഹിച്ച ഗഫൂർ കോൽകളത്തിൽ എന്ന ഈ യുവ ജനപ്രതിനിധി തന്റെ കർമ്മ രംഗം ക്രിയാത്മകമായ അനുഭവങ്ങളുടെ തുറന്ന പുസ്തകമായാണ് സമർപ്പിക്കുന്നത്.

District News

മലമ്പുഴ ബ്ലോക്ക് പഞ്ചായത്ത് കെട്ടിടം ഉദ്ഘാടനം ചെയ്തു

മലമ്പുഴ ബ്ലോക്ക് പഞ്ചായത്തിന്റെ ഒരു കോടി 10 ലക്ഷം രൂപ വിനിയോഗിച്ച് നവീകരിച്ച കെട്ടിടത്തിന്റെ ഉദ്ഘാടനം ഭരണപരിഷ്‌കാര കമ്മീഷന്‍ ചെയര്‍മാനും മലമ്പുഴ എം.എല്‍.എയുമായ വി. എസ്. അച്യുതാനന്ദന്റെ സന്ദേശം വായിച്ച് ഉദ്ഘാടനം ചെയ്തു. മലമ്പുഴ ബ്ലോക്ക് പഞ്ചായത്ത് പ്രസിഡന്റ് കെ. പി. ഷൈജ അധ്യക്ഷയായി. മലബാര്‍ സിമന്റ്‌സ് ലിമിറ്റഡ് ഡയറക്ടര്‍ സുഭാഷ് ചന്ദ്രബോസ് ഉദ്ഘാടന സന്ദേശം വായിച്ചു. വൈസ് പ്രസിഡന്റ് കാഞ്ചന സുദേവന്‍, സ്റ്റാന്‍ഡിങ് കമ്മിറ്റി ചെയര്‍മാന്മാരായ വി. സി ഉദയകുമാര്‍, പി പി രാധാമണി, ഹരി ലക്ഷ്മി, ജില്ലാ പഞ്ചായത്ത് അംഗം നിതിന്‍ കണിച്ചേരി, വിവിധ ഗ്രാമപഞ്ചായത്ത് പ്രസിഡന്റുമാരായ ഇന്ദിരാ രാമചന്ദ്രന്‍, എസ് ഷൈലജ, രാജലക്ഷ്മി, ബ്ലോക്ക് പഞ്ചായത്ത് അംഗങ്ങളായ സി. ഗീത, വി. സുബ്രഹ്മണ്യന്‍, എസ് വിനേഷ്, പി. പ്രീത, എസ് അനിത, കെ. ജഹ്ഫര്‍, കെ. ഹരിദാസന്‍, പഞ്ചായത്ത് എക്‌സി. എന്‍ജിനീയര്‍ അനീഷ്, ബ്ലോക്ക് പഞ്ചായത്ത് സെക്രട്ടറി ഉമ്മര്‍ കൊങ്ങത് എന്നിവര്‍ പങ്കെടുത്തു.

ജില്ലയില്‍ ക്ലസ്റ്ററുകള്‍ക്ക് സാധ്യത. പൊതുജനങ്ങള്‍ സഹകരിക്കണം : മന്ത്രി എ. കെ ബാലന്‍

ജില്ലയില്‍ ക്ലസ്റ്ററുകള്‍ക്ക് സാധ്യത; പൊതുജനങ്ങള്‍ സഹകരിക്കണം- മന്ത്രി എ. കെ ബാലന്‍ പാലക്കാട് ജില്ലയില്‍ പുതിയ ക്ലസ്റ്ററുകള്‍ക്ക് കൂടി സാധ്യത ഉള്ളതായി മന്ത്രി എ. കെ ബാലന്‍. കഴിഞ്ഞ ഏഴ് ദിവസങ്ങളിലായി നടത്തിയ 684 പരിശോധനയില്‍ 63 പോസിറ്റീവ് കേസുകള്‍ കണ്ടെത്തിയ സാഹചര്യത്തില്‍ പുതുനഗരം മേഖലയില്‍ ക്ലസ്റ്റര്‍ സാധ്യതയുള്ളതായി മന്ത്രി പറഞ്ഞു. പാലക്കാട് കെ.എസ്.ഇ.ബി ഐ.ബിയില്‍ നടന്ന പത്രസമ്മേളനത്തില്‍ സംസാരിക്കുകയായിരുന്നു മന്ത്രി. ജൂലൈ 18 മുതല്‍ നടത്തിയ 10597 ആന്റിജന്‍ ടെസ്റ്റുകളില്‍ 547 പോസിറ്റീവ് കേസുകള്‍ കണ്ടെത്തിയതിനെ തുടര്‍ന്നാണ് പട്ടാമ്പി മേഖല ക്ലസ്റ്ററായി പ്രഖ്യാപിച്ചത്. തുടര്‍ന്ന് മുതുതലയില്‍ നടത്തിയ 348 ടെസ്റ്റുകളില്‍ 69 പോസിറ്റീവ് കേസുകള്‍ കണ്ടെത്തി. സമാന പ്രവണതയാണ് പുതുനഗരം പഞ്ചായത്തിലും ഉണ്ടായത്. കൂടാതെ, കോങ്ങാട് മേഖലയില്‍ നടത്തിയ 1109 ടെസ്റ്റുകളില്‍ 63 രോഗബാധിതരെയാണ് കണ്ടെത്തിയത്. നിലവില്‍ ഇവിടെ കണ്ടെയ്ന്മേന്റ് സോണായി തുടരുകയാണ്. പട്ടാമ്പിയില്‍ ഉണ്ടായ രോഗവ്യാപന പ്രതിഭാസം ജില്ലയില്‍ വ്യാപിക്കാതിരിക്കാന്‍ പൊതുജനങ്ങള്‍ പോലീസ്, തദ്ദേശസ്വയംഭരണ സ്ഥാപനങ്ങള്‍, ആരോഗ്യ വകുപ്പ് അധികൃതരുമായി സഹകരിക്കണമെന്നും മന്ത്രി അറിയിച്ചു.

വാളയാർ ഡാം തുറന്നു.

നീരൊഴുക്ക് വർദ്ധിച്ച് ജലനിരപ്പ് ഉയർന്നതിനാൽ വാളയാർ അണക്കെട്ടിന്റെ മൂന്ന് ഷട്ടറുകൾ ഒരു സെന്റീമീറ്റർ വീതം തുറന്നതായി എക്സിക്യൂട്ടീവ് എൻജിനീയർ അറിയിച്ചു. 200.86 മീറ്റർ ആണ് നിലവിലെ ജലനിരപ്പ്. ഡാമിന്റെ പരമാവധി ജലനിരപ്പ് 203 മീറ്ററാണ്. പ്രദേശത്ത് മഴ കുറവാണെങ്കിലും അണക്കെട്ടിലേക്കുള്ള നീരൊഴുക്ക് ക്രമാതീതമായി വർദ്ധിച്ചതിനെ തുടർന്നാണ് ഡാം തുറക്കേണ്ട സാധ്യത ഉണ്ടായതെന്ന് അധികൃതർ അറിയിച്ചു.

11000 ബെഡുകളോടെ ജില്ലയില്‍ 115 ഫസ്റ്റ് ലൈന്‍ ട്രീറ്റ്‌മെന്റ് സെന്ററുകള്‍ സജ്ജം.

കോവിഡ് ബാധിതരെ പ്രവേശിപ്പിക്കുന്നതിനായി ജില്ലയില്‍ 115 ഫസ്റ്റ് ലൈന്‍ ട്രീറ്റ്‌മെന്റ് സെന്ററുകള്‍ സജ്ജമാക്കിയതായി മന്ത്രി എ.കെ ബാലന്‍ അറിയിച്ചു. ഇവിടെ 11000 ബെഡുകള്‍ ഒരുക്കിയിട്ടുണ്ട്. ആവശ്യമെങ്കില്‍ 10000 ബെഡുകള്‍ കൂടി തയ്യാറാക്കും. നിലവില്‍ 2000 കിടക്കകള്‍ എല്ലാവിധ സൗകര്യങ്ങളോടെ സജ്ജീകരിച്ചിട്ടുണ്ട്. പാലക്കാട് ഗവ. മെഡിക്കല്‍ കോളെജ്, മാങ്ങോട് കേരള മെഡിക്കല്‍ കോളെജ്, പെരിങ്ങോട്ടുകുറിശ്ശി എം.ആര്‍.എസ്, പട്ടാമ്പി സംസ്‌കൃത കോളെജ് എന്നിവിടങ്ങളില്‍ പരമാവധി സൗകര്യങ്ങള്‍ ലഭ്യമാക്കാനുള്ള നടപടി സ്വീകരിച്ചിട്ടുണ്ട്. ജില്ലയിലെ കോവിഡ് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കാന്‍ ഡോക്ടര്‍മാരടക്കം 1032 ജീവനക്കാരെ നിയമിക്കാന്‍ തീരുമാനിച്ചതില്‍ 322 പേര്‍ ജോലിയില്‍ പ്രവേശിച്ചു. ബാക്കിയുള്ളവരെ രണ്ടാഴ്ചക്കകം നിയമിക്കും. കോവിഡ് ആശുപത്രിയായ ജില്ലാ ആശുപത്രിയില്‍ 26 വെന്റിലേറ്ററുകള്‍ സജ്ജമാണെന്നും മരുന്നുകള്‍ ആവശ്യത്തിന് ലഭ്യമാണെന്നും മന്ത്രി അറിയിച്ചു.

Programms

Videos

മണ്ണാര്‍ക്കാട് പൂരം 2020 - ചെട്ടിവേല തത്സമയം

മണ്ണാര്‍ക്കാട് പൂരം 2020 - ചെട്ടിവേല തത്സമയം

മണ്ണാര്‍ക്കാട് പൂരം തത്സമയം : പഞ്ചാരിമേളം, കുടമാറ്റം

മണ്ണാര്‍ക്കാട് പൂരം തത്സമയം : പഞ്ചാരിമേളം, കുടമാറ്റം

മണ്ണാര്‍ക്കാട് പൂരം തത്സമയം : ഡബിള്‍ നാദസ്വരം, ഡബിള്‍ തായമ്പക, പാഞ്ചാരിമേളം, കുടമാറ്റം .

മണ്ണാര്‍ക്കാട് പൂരം തത്സമയം : ഡബിള്‍ നാദസ്വരം, ഡബിള്‍ തായമ്പക, പാഞ്ചാരിമേളം, കുടമാറ്റം .

മണ്ണാര്‍ക്കാട് പൂരം തത്സമയം : ഡബിള്‍ നാദസ്വരം, ഡബിള്‍ തായമ്പക, പാഞ്ചാരിമേളം, കുടമാറ്റം .

മണ്ണാര്‍ക്കാട് പൂരം തത്സമയം : ഡബിള്‍ നാദസ്വരം, ഡബിള്‍ തായമ്പക, പാഞ്ചാരിമേളം, കുടമാറ്റം .