സംസ്ഥാനം നാളെ പോളിങ് ബൂത്തിലേക്ക്, മണ്ണാർക്കാട് മണ്ഡലത്തിൽ 180 പോളിങ് സ്റ്റേഷനുകൾ, ആകെ 2,01,091 വോട്ടര്‍മാര്‍, മണ്ഡലത്തിലെ പോളിങ് സാമഗ്രികളുടെ വിതരണം നെല്ലിപ്പുഴ ഡിഎച്ച്എസ്എസിൽ നടന്നു. പാലക്കാട്‌ ജില്ലയിലാകെ 23,15,990 വോട്ടര്‍മാരുള്ളതിൽ 11,31,562 പുരുഷന്മാരും 11,84,406 സ്ത്രീകളും 22 ട്രാന്‍സ് വ്യക്തികളും ഉൾപ്പെടുന്നു. മണ്ണാര്‍ക്കാട് മണ്ഡലത്തിൽ 2,01,091 ഉള്ളതിൽ 99,004 പുരുഷന്മാര്‍, 1,02,086 സ്ത്രീകള്‍, 1 ട്രാന്‍സ് വ്യക്തി എന്നിങ്ങനെയാണുള്ളത്. മണ്ഡലത്തിലെ പോളിങ് സാമഗ്രികളുടെ വിതരണ കേന്ദ്രമായ ഡി എച്ച് എസ് നെല്ലിപ്പുഴ സ്കൂളിൽ 15 കൗണ്ടറുകളാണ് ഒരുക്കിയത്. ജിപിഎസ് സൗകര്യമുള്ള വാഹനങ്ങളിലാണ് പോളിങ് സാമഗ്രികൾ അതാത് ബൂത്തുകളിലേക്ക് എത്തിക്കുന്നത്. ജില്ലയിലാകെ 128 പ്രശ്‌നബാധിത ബൂത്തുകളിൽ 53 എണ്ണമാണ് മണ്ണാർക്കാടുള്ളത്. ഈ ബൂത്തുകളിൽ മൈക്രോ ഒബ്‌സര്‍വര്‍മാരെ നിയോഗിച്ചിട്ടുണ്ട്. കൂടാതെ, പോളിങ് ബൂത്തുകള്‍ കേന്ദ്രീകരിച്ച് വെബ്കാസ്റ്റിങ് സംവിധാനം ഒരുക്കിയിട്ടുണ്ട്. ആനവായ്, സിംഗപ്പാറ

എന്നിവിടങ്ങളിൽ ഇന്റർനെറ്റ്‌ പരിമിതി ഉള്ളതിനാൽ ഇവിടെ വീഡിയോ കവറേജ് ആണ് ഏർപ്പെടുത്തിയിരിക്കുന്നത്. ജില്ലയിലാകെ 10152 പോളിങ് ഉദ്യോഗസ്ഥരെയാണ് നിയോഗിച്ചിട്ടുള്ളത്. ഇതില്‍ 2538 പ്രിസൈഡിങ് ഓഫീസര്‍മാരും 2538 ഫസ്റ്റ് പോളിങ് ഓഫീസര്‍മാരും ഉള്‍പ്പെടും. പുറമെ ഒരു ബൂത്തില്‍ രണ്ട് പോളിങ് ഓഫീസര്‍ എന്ന കണക്കില്‍ 5076 പോളിങ് ഓഫീസര്‍മാരും ഉള്‍പ്പെടുന്നു. സമ്പൂര്‍ണ്ണ ഹരിതചട്ടം പാലിച്ചാണ് പോളിങ് ബൂത്തുക്കള്‍ സജ്ജീകരിച്ചിരിക്കുന്നത്. കൂടാതെ, വോട്ടെടുപ്പ് ദിനത്തില്‍ പോളിങ് ബൂത്തുകള്‍ കേന്ദ്രീകരിച്ച് ജില്ലാ മെഡിക്കല്‍ ഓഫീസിന്റെ വൈദ്യസഹായം ലഭ്യമാക്കും. പാലക്കാട് ലോകസഭ മണ്ഡലത്തിൽ 10 സ്ഥാനാര്‍ത്ഥികളാണുള്ളത്. വോട്ടിങ് മെഷിനിൽ 1 എൻഡിഎ, 3 എൽഡിഎഫ്, 4 യുഡിഫ് എന്നിങ്ങനെയാണ് മുന്നണി സ്ഥാനാർഥികളുടെ സ്ഥാനം. ജില്ലയിൽ പോള്‍ ചെയ്ത വോട്ടിങ് മെഷീനുകള്‍ സുരക്ഷിതമായി സൂക്ഷിക്കുന്നതിനുള്ള സ്‌ട്രോങ് റൂം സജ്ജീകരിച്ചിട്ടുള്ളതും വോട്ടെണ്ണല്‍ കേന്ദ്രമായി നിശ്ചയിച്ചിട്ടുള്ളതും പാലക്കാട് ഗവ വിക്ടോറിയ കോളേജാണ്.